આક્ષેપોથી આરંભો સફળતાની યાત્રા
■■■■◆◆◆◆◆■■■■
એકવખત એક ગધેડો માલિકના ઘરેથી નીકળીને ચાલતા-ચાલતા ગામની ભાગોળે પહોંચ્યો. ગામના પાદરમાં એક નાનો કુવો હતો જેમાં પાણી નહતુ અને લોકો તેમાં કચરો ફેંકતા. પેલો ગધેડો આ કુવામાં પડી ગયો અને ભોંકવા લાગ્યો. કોઇએ ગધેડાના માલિકને જઇને ગધેડો કુવામાં પડી ગયો છે તે સમાચાર આપ્યા.
માલિક તો સમાચાર મળતા જ મનમાં મલકાયો. આમ પણ આ ગધેડો એને ભારરુપ લાગતો હતો કારણકે ઉંમરને કારણે એ કોઇ કામ કરી શકતો નહોતો. માલિકે વિચાર્યુ કે ગધેડાને કુવામાંથી બહાર કાઢીશ તો એને સાચવવો પડશે એના કરતા આ સરસ તક મળી છે કુવામાં માટી નાખીને કુવાને પુરી દઉં એટલે ગધેડો પણ દટાઇ જશે.
માલિક કુવા કાંઠે પહોંચ્યો અને કુવામાં પડેલા ગધેડા સામે જોયુ. ગધેડાને લાગ્યુ કે માલિક બચાવવા આવ્યા છે એટલે એણે ભોંકવાનું બંધ કર્યુ. થોડીવારમાં ઉપરથી માટી પડવાની શરુ થઇ એટલે ગધેડાને માલિકનો ઇરાદો સમજાઇ ગયો.
ગધેડાએ કોઇપણ જાતનો વિરોધ કર્યો નથી અને ડર્યો પણ નહી. એણે એક નવો નુસખો અજમાવ્યો. એમના પર પડેલી માટીને એ ખંખેરી નાખે એટલે માટી નીચે જતી રહે પછી એ જ માટી પર પોતે ઉભો રહી જાય. ધીમે ધીમે કુવો પુરાવા લાગ્યો અને ગધેડો પણ ઉપર આવવા લાગ્યો. માલિક તો એમ જ માનતો હતો કે ગધેડા પર નાંખેલી આ માટી નીચે દબાઇને ગધેડો મરી ગયો હશે. કુવામાં ઘણી બધી માટી પુરાવાથી ગધેડો ઉપર આવી ગયો અને કુદીને કુવાની બહાર પણ નીકળી ગયો. માલિક તો ફાંટી આંખે ગધેડા સામે જોઇ રહ્યો.
ઇર્ષાથી બળી રહેલા કેટલાય લોકો આપણને નુકશાન કરવાના ભાવથી આપણા વિષે એલફેલ બોલે છે અને સમાજમાં આપણને નીચે પાડવાનો પ્રયાસ કરે છે આવા લોકોની સામે લડવાને બદલે એમણે આપણા પર નાંખેલા આ શબ્દોને ખંખેરીને એના જ ઉપયોગ દ્વારા ઉપર આવી જવું.
નોંધ: આ નાના પ્રસંગ પરથી ગધેડા (ગર્દભ રાજ)! પાસેથી શીખવા જેવી ત્રણ મહત્વની બાબત:
1. ગમે તેટલો ભાર હોય વહન કરવો!
2. તડકો, ટાઢ, વર્ષા ગમે એ સંજોગો હોય, પોતાનું કાર્ય કરે રાખવું!
3. જે મળે તેમાં સંતોષ રાખવો!
એટલે મારુ કહેવું એમ નથી કે ગધેડા જેવા બનો!! પણ આ પ્રાણી પાસેથી આટ આટલું શીખવા જેવું હોવા છતાંય માણસ એને તુચ્છ પ્રાણી ગણે છે!!
No comments:
Post a Comment
આજની કૃતિ જો આપ સર્વે મિત્રોને પસંદ આવી હોય તો થોડી તકલીફ ઉઠાવી અને આપના પ્રતિભાવ / કોમેન્ટ્સ જરૂર ફેશબુક પર અથવા બ્લોગ પોસ્ટ પર મૂકવા કોશિશ કરશો ...